Хотугу улуустарга таһаҕастаах уонна оттуктаах бастакы борохуоттар Өлүөнэ өрүһүнэн айаннаан иһэллэр. «ЛОРП» ААО хотугу улуустарга 400 тыһыынча туонна хаһаайыстыбаннай таһаҕаһы тиэйиэх буолан былаан ылыммыта . От ыйын 14 күнүнээҕи туругунан, хотугу муоранан барар суол сабыллан турар. Күнүстэри-түүннэри күнү-дьылы уонна муус усулуобуйатын кэтээн көрүү ыытыллар.
От ыйын бастакы аҥарыгар «Дьабарыкы-Хайа» шахтаттан таас чоҕу тиэйии саҕаламмыта. Ол курдук, бүгүҥҥү күҥҥэ «Капитан Богатырев» теплоход Жиганскай улууһугар сылдьар, онтон «Капитан Слобожанин» – Алдантан Өлүөнэ өрүскэ тахсар. Хотугу улуустарга «Дьабарыкы-Хайа» шахтаттан 10 тыһыынча туонна чох тиэллибит.
Уус-Кут нефтебазатыттан Булуҥ уонна Индигирка өрүс устатыгар сытар улуустарга дизельнай оттук толору тиэллэн, танкердарынан ыытыллыбыт. Бүгүҥҥү күҥҥэ Яна өрүс устатыгар сытар улуустарга дизельнай оттугу тиэммит «Ленанефть-2063» танкер сылдьар. Бу туһунан СИА биллэрэр.
Онтон Дьокуускайдааҕы уу пордугар хотугу улуустарга анаммыт таһаҕас хомулла сылдьар.
