Өлүөнэ нөҥүө муоста тардыллыа диэбиттэрэ син балачча буолла. Ол эрэн бүгүҥҥэ диэри тутуу бырайыагын да ылына иликтэр. Сылтан-сыл сыаната үрдүү турар. Бастакы кэмҥэ федеральнай киинтэн элбэх үбү көрдөөбөккө бэйэбит күүспүтүнэн уйунар былаан баар буоллаҕына, билигин сыаната уонча төгүл улааппытын кэннэ оннук кыах суох.
Арааскыта Москва даҕаны аһара элбэх харчыны муоста тутуутугар быраҕыан баҕарбат быһыылаах. Аҕыйах хонуктааҕыта өрөспүүбүлүкэ салалтата Арассыыйа транспорын, тимир суолун сайдыытыгар эппиэттиир тойотторун кытта көрүстэ. Егор Борисов саайтыгар тахсыбыт матырыйаалынан көрдөххө, муоста эрэ бырайыагыгар тохтообокко, тоннель тутуллуон сөбүн эмиэ көрүөххэ наада диэбиттэр. Муостаттан тоннель тутуута саамай сүрүн уратыта сыаната буолар, ити таһынан тутуута судургутунан, бырайыага түргэнник оҥоһулларынан, халаан уута үлэҕэ мэһэйдээбэтинэн уонна көрүүтэ-харайыыта уустуга суоҕунан биһиги салалтабытын үөртэ.
Муоста дуу тоннель дуу Дьокуускайы сылы быһа, айылҕа хаппырыыһыттан тутулуга суох, анараа биэрэги кытта сибээһин олохтуо диэн былааннаах тутуллар. Ол да буоллар айылҕа кубулҕаттарын, киһи төһө да сайыннар, билигин кыайар кыаҕа суох. Үгүспүт туора-маара барбыт Саха сиригэр тардыллыбыт тимир суол хаартыскатын көрбүтэ буолуо. Сиргэ, күн анныгар суолбут ити курдук дьаабыланар буоллаҕына, өрүс анныгар тутуллубут тоннель хайдах туруктаах буолара биллибэт.
