Федеральнай сокуоннарга ийэ хапытаалын туһаныы туһунан күүтүүлээх уларыйыылар олоххо киирдилэр. Атырдьах ыйын 2 күнүттэн ийэ хапытаал харчытынан олорор дьиэ боппуруоһун быһаарар быдан чэпчээтэ, чуолаан тыа сирин олохтоохторугар.
Саҥа киириилэри РФ Пенсионнай Фондун Саха сиринээҕи отделениятын социальнай төлөбүр отделын начальнига Александра Павлова сиһилии билиһиннэрдэ:
- Саҥа киирии саамай көдьүүстээх, туһалаах түгэнинэн, биирдиилээн тутууну подрядчик өҥөтө суох ийэ хапытаалынан төлүүрү сокуон көҥүллээтэ. Ол аата, дьиэ кэргэн атын тэрилтэлэрдиин подряд дуогабарын түһэрсибэккэ бэйэтэ дьиэ туттар кыахтанна. Төлөбүр икки хайысханан барыа: ийэ хапытаалын сууматын аҥаара сайабылыанньа түҺээтин кытта төлөнүө. Онтон сыл аҥаарынан, дьиэ тутуута саҕаламмыта бигэргэтилиннэҕинэ, иккис аҥаара төлөнөр. Маны таһынан, бу хапыыталынан олорор дьиэни кэҥэтиигэ эмиэ туһаныахха сөп.
Өскөтүн дьиэ кэргэн оҕо 3 сааҺын туоларын кэтэспэккэ, дьиэ туттубут буоллаҕына, тутуутун хорумньутугар компенсация ылар кыахтанна. Усулуобуйа — дьиэ 2007 сыл тохсунньу 1 күнүн кэнниттэн тутуллубут буолуохтаах.
Маны таһынан, оҕо 3 сааһын туолаатын кытта, кредит иэҺин сабарга, төрөппүт талбыт бириэмэтигэр сайабылыанньа түһэриэн сөп, оччотугар 2 ыйынан харчы счекка кэлэн түһэр.
Өссө биир улахан уларыйыынан, төрөөт бастакы нэдиэлэтигэр өлбүт оҕолоох төрөппүттэр, ЗАГС-ҕа тиийэн оҕо төрөөбүтүн туһунан туоһу суругу ыларга туруорсан, ийэ хапытаалынан туһанарга сорунуохтарын сөп.
Бүгүҥҥү күн туругунан, республика үрдүнэн ийэ хапытаалыгар судаарыстыба сертификата бэриллиитин туһунан 24 582 быҺаарыы ылыллан турар. Кредит иэһин сабарга 472 645 тыһыынча суумалаах 1590 быһаарыы ылыллыбытыттан, номнуо 429 101 тыһыынча солкуобай туһаҕа барда. Бу туһунан СИА сырдатар.
Комментарии
Сообщение:
Отправить Отмена