Бүлүү бөлөх оройуоннарыгар ардах кэлэ-кэлэ түһэн от үлэтин улаханнык атахтаата. Кэнники, омуннаан эттэххэ, ый аҥаарыттан ордук халлааммыт кутта быһыылаах. Арыый тохтоон «һуу» гыннардаҕына, тыа дьоно ходуһаларын диэки дьулуруйаллар.
Быйыл Ньурба улууһугар түөрт тыһыынчаттан тахса үлэһит окко сылдьар. Оҕустахтарын аайы ардах түһэр буолан, охсуллубут от үксэ да хомуллубакка сытар. Улуус тыа хаһаайыстыбатын салаатын салайааччыта Андрей Константинович Андреев эппитинэн, атырдьах ыйын 9 күнүн туругунан көрдөххө, 38 тыһыынча туона оттуохтаахтарыттан 17 520 туона от дьаһалынна, эбэтэр туруоруллубут былаантан 41,11% туолла. Былырыын баччаларга былаан 69% туолбута. Ньурба улууһун иһиттэн билигин Сүлэлэр бэркэ баран иһэллэр. От былаанын 80% толордулар.
Чуукаардар, Таркаайылар эмиэ хаалсыбаттар. Чаппанда уонна Ньурбачаан кыстыкка былааннарын улахан аҥаарын толордулар. Быйыл улуус үрдүнэн саамай хаалбыттар Хорула уонна Малдьаҕар. Санааларын түмэн, билигин отой күүскэ ылсыахтарын наада. Оттон үүт туттарааһынын туһунан этэр буоллахха, бу сылга үүт туттарар тэтим былырыыҥҥытааҕар бэркэ баран иһэр. Үрүҥ илгэни ньурбалар 2509 туона туттардылар.
Комментарии
Сообщение:
Отправить Отмена