Бу сарсыарда Дьокуускай аэропордуттан ОМОН этэрээтэ Хотугу Кавказка көттө. Алта ыйга.
Саха байыастара Чечня Ханкала диэн бөһүөлэгэр уонна Владикавказка (Хотугу Осетия-Алания өрөспүүбүлүкэтэ) бэрээдэги көрүөхтэрэ. Эйэлээх кэмҥэ Арассыыйаҕа «итии туочукалар» бааллара киһини дьиксиннэрэр. Уолаттарбыт бары этэҥҥэ эргиллэн кэлиэхтэригэр баҕарыаҕыҥ. Киһи сырыттаҕына сылдьар, үтүө санаабыт биир дойдулаахтарбытыгар көмөлөстүн.
ИДьМ пресс-сулуууспата иһитиннэрэринэн, ОМОН байыастара Чечняҕа, Осетияҕа баҕа өттүлэринэн бардылар. Кинилэри ким да бирикээстээн ыыппат диэн коллегалара этэллэр.
Этэрээти арыаллыыр полковник Олег Лебедь:
-- Бу командировкаҕа саамай бэлэмнээх байыастар бардылар. Байыаннай быраастар сөбүлэҥнэрит ылбыт дьон. Өй-санаа, сиэр-майгы да өтттүнэн чэгиэн уолаттар, -- диир. Оннук эрэ буоллун.
Оттон, тутаах милииссийэбит – Яков Стахов, билигин, Хотугу Кавказ регионугар сылдьар эбит. Кини ОМОН байыастарын ыннараа көрсүөхтээх диэн этэллэр.
Сөмөлүөтү атаара киирбит солбуйар миниистир Константин Неустроев уолаттарга этэҥҥэ сулууспалаан, бары дойдуларыгар эргиллэн кэлэллэригэр баҕарда. Михаил аҕабыыт сибэтиэй уунан байыастары алҕаата.
Комментарии
Сообщение:
Отправить Отмена