Өлүөхүмэҕэ атырдьах ыйын15 күнүгэр дьэ күүтүүлээх түгэн үүннэ. Саха сирин норуоттарын бэһис спортивнай күрэхтэһиитэ үөрүүлээх быһыыга-майгыга аһылынна.
Күрэх аһыллар сиэрэ-туома саҥа тутуллубут стадиоҥҥа барда. Үөрүүлээх аһыллыы бырааһынньыгар Саха сирин аҕа баһылыга Егор Борисов, дьокутааттар, бырабыыталыстыба чилиэннэрэ, бочуоттаах ыалдьыттар, бэтэрээннэр, спортсменнар уонна олохтоохтор кыттыыны ыллылар. Бу улахан күрэхтэһии Өлүөхүмэ куорат 375 сааһын туолар бириэмэтигэр сөп түбэстэ. Онон оройуон сайдар суолга турбутун биир улахан кэрэһитэ буолбутун чопчулуур.
Күрэх бэлэмин кэмигэр Өлүөхүмэҕэ элбэх тутуу үлэтэ барда. Ол тутуулар бары олоххо киирдилэр. Былыргы куорат тас көстүүтэ биллэ тубуста, киэркэйдэ. Күрэхтэһиигэ барыта холбоон 36 хамаанда күөн көрсүөҕэ. Кылаабынай судьуйанан Альберт Трофимов үлэлиэҕэ. Үөрүүлээх аһыллыыга Саха сирин норуоттарын спортивнай күрэхтэһиилэрин уотун олохтоох спортсмен Василий Мамонтов уматта. Аһыллыы сиэрэ-туома оһуохайынан түмүктэннэ.
Комментарии
Сообщение:
Отправить Отмена