Сунтаарга киирэр суолга, паромтан тахсыыга тута айанньыты модьу тиит саҕа, ыраахтан бэлиэтик көстөр кириэс көрсөр. Маннык кириэс Сунтаар түөрт өттүгэр баар эбит. Бөһүөлэк саҥа бэлиэ сирдэрэ хотуттан, соҕурууттан, арҕааттан, илинтэн кэлэр аартык суолларга тураллар. Бу өйдөөтөххө дьикти кириэстэр Саха сиригэр өссө ханнык да нэһилиэккэ суохтара. Дьэ, ол иһин интэриэһиргээн олохтоохтортон тоокколоспуппут, ити кириэстэри бу сайын Светлай аҕабыыта Отец Тихон кэлэн, хас да күнү быһа мэлииппэ ааҕан, таҥараттан алгыс көрдөөн туран туруорбут.
Киристэри туруорууну көҕүлээччи, Бүлүү бөлөх оройуоннарын барыларын аһынан-таҥаһынан, араас малынан-салынан сиэдэрэйдик хааччыйан олорор «Татыйыына» маҕаһыыннарын ситимин хаһаайката Нина Прокопьевна Герасимова биир дойдулаахтарын материальнай эрэ буолбакка, духуобунай эйгэлэрин эмиэ араҥаччылыыр сыалтан бу кириэстэри туттарбыт. Нина Прокопьевна Сунтаарга анаан –минээн церковь туттарбыта, ону таһынан билигин духуобунай оскуола аһар санаалаах сылдьар. Оттон чуолаан кириэстэр туох суолталаахтарын, кини бэйэтэ кэпсииринэн, «окрест» диэн сиэр-туом баар эбит. «Окресность» диэн тыл «крест», «окрест» диэн тыллартан тахсыбыт, онон хас биирдии сири-дойдуну былыр итинник кириэстэр араҥаччылыыллара эбитэ үһү. Дьэ, ол иһин уһун айаҥҥа турунар айанньыттары уонна нэһилиэк олохтоорун дьайтан-сибиэнтэн бу кириэстэр эрэллээхтик харыстыыллар. Онон Сунтаар олохтоохторо мантан антах туохтан да куттаммакка, кириэс харыстабылыгар эрэнэн кытаанахтык утуйар буолбуттар.
Комментарии
Сообщение:
Отправить Отмена