Тиксии бөһүөлэгэгин таһыгар атырдьах ыйын 27 күнүгэр 03.25 чааска РФ ЫБММ СР салаатын дьуһуурунайыгар Лаптевтар муораларыгар кытылтан 20 миля тэйиччи «Алексей Кулаковскай» диэн ааттаах буксир тимирбитин туһунан иһитиннэрии киирдэ.
Быһылаан буолар кэмигэр буксирга 14 киһилээх экипаж баар эбит. Алдьархай кэнниттэн «Ленанефть-12064» танкер 3 киһини хостообут. Капитан уонна икки мотруос быыһаммыттар. Кинилэр доруобуйаларын туруга син ама, диэн биллэрэллэр. Билигин хаалбыт 11 киһини көрдүүллэр. Быыһыыр үлэҕэ итини сэргэ «Николай Евгенов» гидрографическай судно тардылынна, Тиксииттэн «Полярные авиалинии» хампаанньа МИ-8 вертолетунан РФ ЫБММ СР Кылаабынай управлениетын баһылыга Горкун А.В. салайааччылаах бөлөх көттө.
СӨ правительствотын ыксаллаах быһыыга-майгыга хамыыһыйатын быһаарыытынан, быһылаан тахсыбыт сиригэр Дьокуускайтан «СР быыһыыр сулууспата» ГУ түөрт водолаһа барда.
Тиксиигэ уонна Дьокуускайга суһал штабтар тэрилиннилэр.
Быһылаан тахсыбыт сиригэр күн-дьыл туруга: соҕуруулуу-арҕааттан 10 м/с түргэннээх тыал, салгын температурата +7 оС.
РФ ЫБММ СР Кылаабынай управлениетыгар суукканы мэлдьи үлэлиир суһал линия төлөпүөнэ: 8 (4112) 39-99-99 уонна 8(4112) 42-45-58. Психологтар бөлөхтөрө үлэлиир, диэн СИА кэпсиир РФ ЫБММ СР Кылаабынай управлениетын пресс-сулууспатын иһитиннэриитигэр олоҕуран.
Комментарии
Сообщение:
Отправить Отмена