Владимир уобалаһын Лакинскай куоратыгар мас тардыһыытыгар уобалас күрэхтэһиитэ буолан ааста.

Манна Валерий Нахтин (70 кг), Алексей Наумов (80 кг), Владимир Чичерин (90 кг), Анатолий Шмырев (90-тан үөһэ кг) кыайыылаахтарынан таҕыстылар. Муҥутуур чөмпүйүөн аатын былдьаһыыга икки кэнники ааттаммыт мадьыны хапсыһыыта көрөөччүлэр улахан биһирэбиллэрин, сөҕүүлэрин-махтайыыларын ылла. Күрэхтэһиигэ тоҥ харыйа күлүгүн саҕа модун бухатыырдар кыттан тэрээһини бэркэ сэргэхситтилэр. Бу күрэхтэһиини баһыттан атаҕар диэри олус сэҥээрэн көрбүт Лакинскай мээрэ Игорь Велиев «спорт олус интэриэһинэй көрүҥэ эбит. Балаҕан ыйын бүтүүтүгэр стадиоммутун саҥалыы сэргэхситэн тутан баран өссө улахан, сыаналаах бириистээх мас тардыһыытын күрэхтэһиитин ыытыахпыт» диэн эрэннэрдэ. Инньэ гынан, биһиги мас тардыһыыбыт үтүөтүнэн, лакинскайдар саҥа стадионнанар буоллулар.

kyym.sakha.ru
03.09.2010 10:47 | оригинал статьи | просмотров: 24534