ЭКСПО-2010 аан дойдутааҕы универсальнай быыстапка Шанхайга ыам ыйын 1 күнүттэн алтынньы 31 күнүгэр диэри үлэлиир. Быыстапкаҕа 200-тэн тахса дойду, регион уонна тэрилтэ кыттар. Бэҕэһээ, балаҕан ыйын 6 күнүгэр, Арассыыйа павильонугар Саха сирин экспозицията арылынна.

ЭКСПО-ҕа Арассыыйа секциятын Генеральнай комиссара Владимир Страшко экспозицияны арыйыыга Саха сирин экспозицията Хоту сир тыйыс усулуобуйатыгар куорат цивилизациятын бары өрүттэрин кытта билсиһиннэрэр уонна опыт атастаһарга кыах биэрэр, диэн тоһоҕолоон эттэ. «Экспозицияҕа сүрүн миэстэ «Олоҥхо дойдута» национальнай инновационнай бырайыакка ууруллар, – диэтэ СӨ тас сибээскэ миниистирин бастакы солбуйааччыта Сергей Неустроев. – Бырайыак Дальнай Восток норуоттарын хатыламмат культураларыгар, ыраас айылҕалаах саҥа архитектурнай эйгэни оҥорууга олоҕурар». Ыалдьыттары сахалыы таҥастаах артыыстар алгыһынын көрүстүлэр. Анал витриналарга норуот маастардарын оҥоһуктара, сиртэн хостонор баай арааһа туруоруллубут — сэлии муоһуттан, көмүстэн, алмаастан оҥоһуктар о.д.а. Бриллианнар сорох көрүҥнэрин көрөөччүлэр микроскобунан көрөллөр. Маны сэргэ «Виртуальнай музей» үлэлиир. Манна СӨ национальнай уус-уран музейын хартыыналара уонна экспонаттара түмүллүбүттэр. Баҕалаахтар «Ювелирмания» интерактивнай оонньууга оонньуохтарын сөп. ЭКСПО-2010 быыстапкаҕа Саха сирин күннэрэ балаҕан ыйын 18 күнүгэр диэри буолуохтара. Бу туһунан СИА кэпсиир.

kyym.sakha.ru
07.09.2010 16:07 | оригинал статьи | просмотров: 26631