Бүгүн, балаҕан ыйын 16 күнүгэр, дойду киин куоратыттан Дьокуускайга ыытыллыахтаах Москуба күннэрин делегацията кэллэ.
Ыалдьыттар бастаан Аҕа дойду Улуу сэриитин буойуттарыгар пааматынньыкка сибэкки дьөрбөтүн уурдулар. Дойду тэбэр сүрэҕин Москубаны өстөөх халабырдьыттарыттан 5000 саха саллаата көмүскээбитэ. Москуба куорат бырабыыталыстыбатын официальнай делегациятын баһылыга, регионнар икки ардыларынааҕы сибээскэ уонна национальнай политикаҕа комитет бэрэссэдээтэлэ Михаил Соломенцев дойду тэбэр сүрэҕин Москуба куораты көмүскээбит саха саллааттарын аата хаһан даҕаны умнуллуо суоҕа диэтэ.Кини бэтэрээннэргэ өйдөбүнньүк бэлэххэ сертификаттары туттарда уонна махтанна диэн СИА сырдатар. Бэтэрээннэри чиэстээһин кэнниттэн Михаил Соломенцев салайааччылаах делегация Саха сирин салайааччыларын кытары көрүстэ. Өрүспүүбүлүкэ инновационнай хайысхалаах суолталаах үлэтин сайыннарыы туһунан кэпсэтии барда. 2012 сылга ыытыллар «Азия оҕолоро» V аан дойдутааҕы спортивнай оонньуулары, «Россия – спортивная держава» форуму тэрийэн ыытарга Москуба куорат ньыматын, баай уопутун туһанарга Соломенцев сүбэлээтэ. Үөрэх, туризм инники кэскиллээх сайдар суолларын эмиэ быһаарыстылар. Олох араас араҥаларыгар биир хайысханы тутуһан үлэлээһин дуогабардара баттаннылар.
Комментарии
Сообщение:
Отправить Отмена