Мэҥэлэр «Дойду ситимэ» Дьокуускайдааҕы түмсүүлэрин көҕүлээһининэн алтынньы 18 күнүгэр Национальнай бибилэтиэкэҕэ Улуу Кыайыы 65 сылыгар анаммыт «Суох буоллун сэрии!» диэн ааттаах компакт диискэни сүрэхтээһин буолан ааста.
Диискэҕэ Күннүк Уурастыырап, Иннокентий Сосин, Илья Чаҕылҕан, Афанасий Аржаков, Иннокентий Цыпандин, Макар Хара, Георгий Борисов уонна Степан Тимофеев тылларыгар Вера Васильева, Алексей Попов, Егор Спиридонов, Анастасия Варламова, Марфа Данилова уонна Георгий Никифоров суруйбут ырыалара киирбиттэр.Толорооччу — Опера уонна балет тыйаатырын артыыһа, ССРС култууратын туйгуна, «Бочуот Знага» уордьан кавалера, Мэҥэ Хаҥалас улууһун бочуоттаах олохтооҕо Дмитрий Тихонов. Доҕуһуоллааччы — байаанньыттар уонна хормуоскаһыттар Саха сиринээҕи холбоһуктарын салайааччыта, улахан түһүлгэлэр кыайыылаахтара Мичил Берёзкин.
Сүрэхтээһин, кэнсиэр уонна истиҥ кэпсэтии майгылаахтык тэриллэн, олус көхтөөхтүк барда. Санааны ирэ-хоро үллэстии кэмигэр, айар бөлөххө туґуламмыт сүбэни-соргуну таһынан, суруйааччы Степан Тимофеевка «СӨ норуодунай поэта» диэн ааты иҥэрии сөптөөҕө, тоҕоостооҕо чиҥник этилиннэ. Онно Дмитрий Тихонов «Эйэ, Дьол иһин» ырыаны күргүөм толоруу иннинэ: «Биһиги бүгүҥҥү тэрээһиммит — «Кыымҥа» тахсыбыт туруорсууларга холбоһуу. Бу курдук өрөспүүбүлүкэ дьоно-сэргэтэ суруйааччыга норуодунай ааты иҥэрии иһин туруммута урукку өттүгэр суох этэ», — диэн тоһоҕолоон этиитэ күүстээх саһаҕа буолла.
Итиннэ быһааран эттэххэ, буойун-поэт Степан Тимофеевы өйүүр «Кыымҥа» тахсыбыт матырыйаал түмүллэн, Аҕа баһылык дьаһалтатыгар тиийдэ. Бу түргэнник уонна сиэрдээхтик быһаарылларыгар баҕарыаҕыҥ.
Комментарии
Сообщение:
Отправить Отмена
Хантан атыыласыахх себуй?