Егор Борисов саҥа сылга үктэнэн баран хайдах-туох, ханна ханнык үлэлээбитин туһунан суруналыыстарга кэпсээтэ.

Президент өссө Москваҕа сырыттаҕына, муҥур тойону сыыһа ааттаабытын туһунан Интернет сайтар «кэпсээбиттэрэ». Бүгүн суруналыыстары кытары көрсүһүүгэ Егор Афанасьевич, бэйэтэ, суруксут барыта «ыйытабын дуу, ыйыппаппын дуу» диэн кычыгылана олорор боппуруоһун таарыйда.

Хата, киһибит сыыһа саҥарбытын Интернет-сайтар суруйбуттарыгар биирдэ билбит. «Ханнык түгэҥҥэ «Владимир Анатольевич» диэбиппин өйдөөбөппүн ээ», -- диэн судургу баҕайытык күлэн кэбистэ. Сорохтор «тыл этииҥ ортотугар» диэн өйдөтөөччү буоллулар. Роман Манзяк («Наше время») «өссө тактиката буолуо дии» санаабыппыт диэн күллэртээтэ.

Егор Борисов уоппускаҕа барыан иннинэ, сыл саҕаланыыта тутууга, коммунальнай хаһаайыстыбаҕа, тыа хаһаайыстыбатыгар, геологическай чинчийиигэ, IT технологияҕа о.д.а. атын салааларга үлэһиттэригэр сорудах биэрбитин туһунан кэпсээтэ. Сылы быһа туох үлэ барыахтааҕын чопчулаабыт. Уоппускатын кэнниттэн Москваҕа сылдьан федеральнай тойоттору кытары көрсөн кэпсэппит. В.Путинныын кытары кэпсэтэн эргэ дьиэлэри көһөрүүгэ эбии үп көрдөрбүт. Саха сиригэр эргэ дьиэ уопсай дьиэ ахсааныттан 15%-нын ылар. Арассыыйаҕа ити бырыһыан 3, оттон Илин Уһукка 5%.

Дьоҕус авиацияны сөргүтэргэ туруорсубут. Билигин кыра уйууктаах сөмөлүөттэри даҕаны оҥорор собуот суох, онон билигин Арассыыйа омук дойдуларыттан эрэ кыра сөмөлүөттэри атыылаһар туруктаах. «Икки, үс сылынан дьоҕус авиация букатын суох буолуоҕа», -- диэн Егор Афанасьевич этэр. Оччотугар бачча улахан сирдээх-уоттаах өрөспүүбүлүкэ балаһыанньабыт ыарыыр. Аны, билиэт сыаната ыараханыгар, Егор Афанасьевич, дойду премьерыгар «курдат тарифтарга» (сквозной тариф) чэпчэтии көрүөххэ диэн этии киллэрбит. Холобур, Чокурдаахтан Дьокуускайынан кэлэн Москваҕа , Питергэ ааһар киһи (сайыҥҥы чэпчэтиинэн туһанар эдэр уонна кырдьаҕас дьон) Чокурдаах уонна Дьокуускай икки ардыгар эмиэ 50% чэпчэтиинэн туһанныннар диэн. Холобур, ити дьоһуннаах тылы дойду салалтата ылыннаҕына, хотугу сытар улуустар абыраныахтаахтар. «Астахов билигин Саха сирэ төһө улаханын, айана-сырыыта уустугун чахчы бэйэтэ илэ билэн, итэҕэйэн барда. Билигин айан туһунан боппуруоска кини санаата чыҥха уларыйбыт. Үгүс федераллар Москваттан ырааппакка олорон, биһиги усулуобуйабытын билбэккэ эрэ олорон дьаһайаллар», -- диэн президент сонньуйар.

Биир улахан боппуруос – муоста. Өлүөнэ өрүһү туоруур массыына уонна поезд сылдьар муостата быйылгыттан саҕалаан бастакы үлэтэ саҕаланыахтаах. «Үп тыырылынна, билигин ол үп кэлэр механизма оҥоһуллуохтаах», -- диир. Путин «бу боппуруоһу кимиэхэ сүктэрэбит» диэн ыйыппытыгар, Борисов «Кудриҥҥа» диэн РФ үбүн миниистирин үчүгэй баҕайытык «ыйан» биэрбит. Онон, Алексей Кудрины быһаччы эппиэтинэстээх киһи оҥорон, ханна да ньылбырыйбат турукка киллэрэн кэлбит. «Сотору көрсүһүөхтээхпит» -- диэн этэр.

«АЛРОСА» хампаанньа аһыллар үлэтэ былааннаммытын курдук тигинэччи баран иһэр, «Газпром» Саха сиригэр үлэлиир былаана эмиэ эриэ-дэхси диэн Егор Борисов этэр. Медведеви түҥ-таҥ ааттаабыт Уфаҕа ыытыллыбыт РФ Судаарыстыбаннай сүбэтин президиумун мунньаҕар Егор Борисов тутум үрдүк таһымнааҕын Башкирия сайтара бэлиэтээбиттэр. «Акценнаах саҥатынан, дьүһүнүнэн-бодотунан уратытын үөһээ «кини эрэ бэйэтин дьиҥ санаатын эттэ, күттүөннээх этиини оҥордо» диэн. Егор Борисов омуктар икки ардыларыгар сыһыаҥҥа «Арассыыйа гражданинын үөскэтэр» соругу туруорбута биһирэммит.

ХИФУ, онон-манан эгилиппэккэ-булугулуппакка фонд тэриллэн, быһа инвестицияланарын ситиһэн кэлбит. Владимир Богданов («Сургутнефтегаз») курдук кыахтаах, үптээх-астаах дьон фонда тэрийэн баран, хампаанньаларын кытыаран, университеппыт научнай, үөрэтэр үлэтигэр көмөлөһүөхтэрэ.

Өлөөҥҥө «ниобий» диэн куйаарга көтөр ракеталары тутууга, массыына оҥоруутугар туттуллар сэдэх металл саппааһа баар. Бу сири туһаҕа таһаарыахха диэн президент эппит. «Ниобийдаах сир Томтор диэн ааттаах, саппааһа олус улахан», -- диир. Ленскэй саҥаттан тутуллубута 10 сыл буолбут. Ону бэлиэтэххэ баара диэн Сергей Шойгулуун көрсүбүт. Ону таһынан уот ситимин тардыы, хааччыйыы, Витимҥэ аэропорт тутуутун туһунан тустаах тойоттору-хотуттары көрсөн быһаарсыбыт. Ыйы быһа Москваҕа халтай сылдьыбытах эбит диир санаа үөскээтэ. Кэпсэтии кэпсэтиинэн, билигин аны ол кэпсэтиллибити олоххо киллэриэххэ наада.

Тарҕам алмааһы хостуур «Нижне-Ленское» ААО дьылҕатын туһунан суруналыыстар ыйыттылар. Егор Афанасьевич, ону үс суолунан дьылҕата быһаарыллыан сөп диэн хардарда: эбэтэр бэйэтин сайыннарабыт, эбэтэр «Анаабыр Алмаастарын» АОну кытары холбуубут, эбэтэр атыылыыбыт диэн.

«Былырыын 300 урбаанньыт Дьокуускай куорат сиригэр сир ыларга сайаапка түһэрбит да, биир да киһиэхэ биэрбэтэхтэр», -- диэн В.Обедин («Якутск вечерний») хомуруйда. Ону президент мээр Юрий Заболевы ыҥыран быһааттарыах буолла.

kyym.sakha.ru
15.02.2011 12:44 | оригинал статьи | просмотров: 21084