Муус устар ыйга Усуйаана улууһун Хаһааччыйа нэһилиэгэ төрүттэммитэ 375 сылын бэлиэтиэхтэрэ. Бу туһунан СИА кэпсиир. Бэлиэ тэрээһиҥҥэ бэлэмнэнии үлэтин туһунан тэрийэр бөлөх мунньаҕа буолан ааста. Мунньаҕы вице-премьер Александр Власов ыытта.
Александр Власов былааннаммыт тэрээһиннэр кэмигэр ыытыллыахтара диэн эттэ. Нэһилиэк 375 сылын көрсө эбээн култууратын күннэрэ, табаһыттар слеттара, хотугу многоборье аһаҕас турнира, «Көс дьиэ кэргэн» куонкурус о.д.а. ыытыллара былааннанар.
Быйыл Хаһааччыйа нэһилиэгэр саҥа оскуола (ахсынньы ыйга үлэҕэ киириэхтээх), полярнай чинчийээччилэргэ анаан памятник, Социалистическай үлэ геройдарыгар аллея тутуллара, Арчы дьиэтэ уонна култуурунай-спортивнай комплекс өрөмүөннэнэрэ былааннанар.
Олохтоох бүддьүөттэн харчы көрүллэн, участковай балыыһаҕа өрөмүөн үлэтэ ыытыллыа.
Ону таһынан, СӨ доруобуйа харыстабылын министиэристибэтэ нэһилиэк балыыһатыгар анаан уопсайа 800 тыһ. солк. сууммалаах саҥа тэриллэри ылыаҕа.
Комментарии
Сообщение:
Отправить Отмена