Кулун тутар 2 күнүгэр Арассыыйа судаарыстыбаннай академическай Маалай театрыгар РФ үтүөлээх артыыһа Варвара «Истоки» диэн музыкальнай-драматическай дьүһүйүүнү туруорда. Бу ырыаһыт эстрада атын ырыаһыттарынааҕар уратыта диэн, араас омук култууратын тэҥҥэ көрдөрөр идэлээх. Кини концерыгар элбэх национальнай ансаамбыллар, ырыаһыттар баар буолаллар.

Бу сырыыга Варвара хотугу норуоттар ырыаларын-үҥкүүлэрин көрдөрөр "Чукотка" ансаамбылы уонна Москватааҕы волынщиктар оркестрдарын ыҥырбыт.

Маалай театр Улахан Ордынка уулуссатыгар турар. Былыр нуучча кинээстэрэ бу суолунан Көмүс Ордаҕа түһээн таһаллара үһү диэн концерт аһыллыытыгар Варвара кэпсээтэ. Кини ырыатын истэ биллэр ырыаһыттар кэлбиттэр. Ол курдук Алсу, Лев Лещенко, Юлия Ковальчик Алексей Чумаковтуун саалаҕа бааллара көһүннэ.

«Чукотка» ансаамбыл сыанаҕа бастакынан таҕыста. Ону кытары Саина эмиэ. Үгэс курдук ааттаах-суоллаах «сулустар» ыҥырыллыбыт концертарын тулуйан-тэһийэн тиһэҕэр диэри көрбөттөр. Онон Саиналаах бастакынан тахсын «сулустар» харахтарыгар «түбэһэн» көһүннүлэр.

Концерт кэмигэр аан бастакынан Алсу тахсан барда. Кини леопард дьүһүннээх быычыкаай платьелаах, туох да омуннаах улахан хобулуктаах кугас түүппүлэлээх этэ.

Саиналаах тахсыахтарын иннинэ, Варвара дьүкээбил уотун, полярнай түүн туһунан ураннаах кэпсээбитэ. Саина кугас өҥнөөх унтуулааҕа уонна туох да быһыыта-таһаата чопчу биллибэт тирии соннооҕо. Ырыаһыппыт туох баар талаанын барытын көрдөрдө: айылҕа тыаһын, чыычаахтар ыллыылларын, кыыллар саҥаларын… барытын үтүгүннэ. Дүҥүргэ, хомуска оонньоото. Кини ырыатынан доҕуһуоллатан «чукоткалар» үҥкүүлээтилэр.

Варвара «чукоткалары» кытары өрдөөҕүттэн доҕордоһорун кэпсээтэ. Хас да ырыаны бииргэ ыллаабыттарыттан биирдэстэрэ киин телевидениеҕэ көстүбүт үһү. Бу сырыыга нуучча кыыһа эмиэ чукчалары кытары нүөмэр көрдөрдө.

Варвара биһиги Саинабыт курдук араас омук тылынан ыллыыр эбит. Кини саамай сөбүлүүр тылым – иврит диэн эттэ. Варваралаах Саина айар суоллара майгыннаһар өрүттэрдээх эбит буоллаҕына, үп-харчы чааһынан, биллэн турар улаханнык араастаһаллар. Варвара ол үҥкүүһүтэ, самалык артыыһа элбэҕэ диэн, таҥаһа-саба… майгыта холорук курдук ытыллан олорор. Оттон биһиги кыыспыт нарына-намчыта, симигэ-холкута. Ол гынан баран, талаанынан туох да итэҕэһэ суох дии санаатым. Саина, кытаатан киин сир сыанатыгар киир диэн үтүө санааны баҕарабын.

Саргылаана ДАНИЛОВА,

Москва к..

kyym.sakha.ru
09.03.2011 11:42 | оригинал статьи | просмотров: 17644