Мииринэй оройуонун дьаhалтатын «Кэнчээри ыччакка амарах сыhыаннаах оройуон» диэн ааттаах барылын чэрчитинэн, оройуон кииниттэн сyyстэн ордук биэрэстэ тэйиччи сытар Сүлдьүкээр сэлиэнньэтигэр тохсус төгүлүн «Аҕа күрэҕэ» тэрилиннэ.

Күрэхтэһиигэ Габышевтар (Арыылаах), Ибатуллиннар (Светлэй), Федоровтар (Сүлдьүкээр), Николаевтар (Сүлдьүкээр), Луниннар (Мииринэй) уоллаах аҕа -- спорка, эр киhи сатабылыгар уонна мындырыгар, хабараан быhыыга күөн көрүстүлэр.

Хамаандалар кимнэрин-туохтарын тургутар билиhиннэрии түһүмэҕэр мирнэйдэр бастаатылар. Бэрэбинэни кылбаччы суорууга Светлэйтэн Шайханур уонна Альберт Ибатуллиннар эрэллээхтик бастаатылар. Дэбигис ылларбат, мутуктаах маhы эрбээн хайытыыга Александр уонна Альберт Габышевтар кимиэхэ да иннилэрин биэрбэтилэр. «Таба» муоhугар маамыктаны кыыратыыга (компакт-спортинг) Ибатулиннар эмиэ кими да тулуппатылар. Эстафета сыыдам Габышевтарга кыайыыны тосхотто. Очколары суумалааhын түмүгэр Светлэй олохтоохторо Шайханур уонна Альберт Ибатулиннар атыттары арыый да куоһаран бастаатылар. Иккис миэстэлээхтэр – Александр уонна Альберт Габышевтар (Арыылаах), үһүс миэстэлээхтэр – Валерий уонна Чаҕыл Николаевтар (Сүлдьүкээр). Бириистэри АК «АЛРОСА» Профалмаас идэлээхтэрин сойууhа, Култуура уонна спорт салаата, Мииринэй оройуонун дьаhалтата туруорудулар. Ол курдук, Ибатулиннар бастааннар, сыаналаах, бэртээхэй бириискэ – грильгэ тигистилэр, иккис миэстэлээх Арыылаах дьонугар – Габышевтарга омук эрбиитэ, дьиэ хаhаайыстыбатыгар туттуллар тэрил, үһүс миэстэлээх Николаевтарга ДВД-плеер туттарылынна. Төрдүс уонна бэһис миэстэлээхтэр бириистэн эмиэ маппатылар.

«Аҕа Күрэҕэ – 2011» олус сэргэхтик ааста. Мииринэй оройуонун дьаhалтатын социальнай управленитын салайааччыта Аида Петровна Трифонова: «Ордук олохтоох дьон- сүлдьүкээрдэр ыалдьытымсахтарыттан олус диэн астынныбыт. Маннык тэрээhин кэнэҕэс да ыытылла туруохтара уонна норуокка аҕа уонна уол оруолун өссө чиҥэтэн, үрдэтэн биэриэхтэрэ диэн эрэнэбит».

Станислав Алексеев,

Мииринэй к.

Аида Трифонова архыыбыттан хаартыска.

Чаҕыл.

kyym.sakha.ru
29.03.2011 14:44 | оригинал статьи | просмотров: 12317