Саха сиригэр пенсионер ахсаана былырыыҥҥытааҕар 7.225 киһинэн эбиллибит, уонна барыта 244.443 киһи буолбут. Орто пенсия кээмэйэ, уларыйан-тэлэрийэн, элбээн-улаатан 1 943,29 солкуобайынан үрдээбит, инньэ гынан 11 473,72 солкуобайга тэҥнэспит.
Пенсияҕа тахсыбыт киһи 10 хонук иһинэн ыйдааҕы пенсиятын кээмэйэ быһаарыллыахтаах. Олохтоох пенсионнай фонда салаалара ону сүнньүнэн тутуһаллар эбит. 84% киһи пенсията бу болдьохтон тахсыбакка эрэ анаммыт. Быйыл бу бырыһыаны пенсионниктар 93-кэ диэри улаатыннарыахтаахтар. Онно, биллэн турар, пенсияҕа тахсарга аналлаах докумуоннары кичэйэн бэлэмниэхтэрин, бэрэбиэркэлиэхтэрин наада.
Былырыыҥҥыттан саҕалаан страховой усунуоһу хомуйарга улахан үлэ ыытылынна. 212-с №-дээх ФЗ ирдииринэн, пенсионнай уонна булгуччулаах медицинскэй страхование дохуоттаах бюджетын Россия Пенсионнай Фондата дьаһайар. РПФ-ыгар 30.934 тэрилтэ салайааччылара страховкаланар, ону сэргэ 41.837 киһи бэйэлэринэн страховой усунуос төлүүллэр.
«Электроннай Правительство» бырайыак быһыытынан, билигин докумуоннары электроннай көрүҥүнэн хомуйуу саҕаланна. Саха сирэ Уһук Илин Федеральнай уокурукка куһаҕана суох көрдөрүүлээх. Итинник хабааннаах үлэ салгыы тэнийэрэ, күүһүрэрэ сабаҕаланар. Санаа хоту, хас биирдии киһи интернетинэн киирэн пенсионнай хаппытаала төһө эбиллибитин-көҕүһээбитин билэ олоруохтаах.
Саха сиригэр ийэ хапытаалын сертификата барыта 27 931 ийэҕэ бэриллибит. Онтон 1 477 ыал былырыын кредиттэрин сабарга туттубут. Инньэ гынан 460 мөл. 193 тыһ. солкуобайдаах бааннааҕы иэс сабыллыбыт. Ааҕан-суоттаан көрдөххө ийэ хапытаалын 10-с эрэ ыал туттубут.
Песионнай управлениялар ортолоругар, Уһук Илин таһымыгар күрэхтэһиигэ, Үөһээ Бүлүүтээҕи пенсионнай управление кыайбыт.
Комментарии
Сообщение:
Отправить Отмена