Муус устар 4 күнүгэр Саха Өрөспүүбүлүкэтин Государственнай Мунньаҕын (Ил Түмэн) бэрэссэдээтэлин солбуйааччы, өрөспүүбүлүкэ агротехническай хайысхалаах оскуолаларын түмсүүлэрин президенэ Александр Жирков Мэҥэ Хаҥалас улууһун Мэҥэ нэһилиэгэр сырытта.
Биллэрин курдук, Балыктаах орто оскуолата соторутааҕыта республикатааҕы агрооскуолалар түмсүүлэригэр кандидатынан киирбитэ. Оскуола үлэтин сиһилии билсэн баран, Александр Николаевич Балыктаах оскуолатын резервэттэн түмсүү дьиҥнээх чилиэнигэр киллэрэр туһунан эттэ. Агрооскуолаларга республика өттүттэн 2011 сылга балайда улахан көмө бэлэмнэниллэр. Онно түмсүү дьиҥнээх эрэ чилиэннэринэн буолар оскуолалар ахсааҥҥа ылыллыахтара диэн депутат этэр.
Төгүрүк остуолга нэһилиэк маннык кыһалҕалаах боппуруостара көрүлүннүлэр: «Саха Өрөспүүбүлүкэтин агропромышленнай комплексын сайдыытын программатыгар» кыстык ферманы тутууну уонна механизациялааһыны киллэрии; сэлиэнньэҕэ саҥа киин хочуолунайы тутуу; 2012-2016 сылларга республикатааҕы тутуу тосхолугар Балыктаах оскуолатын саҥа дьиэтин тутууну киллэрии.
«Мэҥэ нэһилиэгэ» МТ баһылыга Ирина Черкашина Александр Николаевич уокурук депутатын быһыытынан нэһилиэк уонна оскуола дьаһалтатын кытта мэлдьи сибээһи тутарын, үгүс кыаллыбат боппуруос үтүө түмүктээхтик быһаарыллыытыгар куруук көмөлөһөрүн бэлиэтээтэ.
Ил Түмэн пресс-сулууспата.
Комментарии
Сообщение:
Отправить Отмена