Государственнай Мунньах (Ил Түмэн) Арктика уонна аҕыйах ахсааннаах хотугу төрүт норуоттар проблемаларыгар сис кэмитиэтин бэрэссэдээтэлэ, Ил Түмэн дьокутаата Виктор Губарев муус устар 7-10 күннэригэр Усуйаана оройуонун Хаһааччыйа сэлиэнньэтэ олохтоммута 375 сылыгар аналлаах үөрүүлээх тэрээһиннэргэ кыттыаҕа
Өрөспүүбүлүкэ салалтатын делегациятыгар депутаты таһынан бырабыыталыстыба бэрэссэдээтэлин солбуйааччы Александр Власов, министиэристибэлэр уонна биэдэмистибэлэр салайааччылара, эппиэттээх үлэһиттэрэ киирдилэр.
Үбүлүөй чэрчитинэн эбээн культуратын күннэрэ, табаһыттар зонатааҕы слеттара, спорт хотугу көрүҥнэригэр күрэх, «Көс ыал» конкурс уонна да атын тэрээһиннэр ыытыллыахтара.
Муус устар 7 күнүгэр уус-уран самодеятельность кыттыылаахтарын, айар коллективтар кэнсиэрдэрэ буолар. Муус устар 8 күнүгэр олохтоох суруйааччылар кинигэлэрин сүрэхтэниитэ, «Хаһааччыйа – 375 сыл» стендэни, эбээн культуратын күннэрин, Новосибирскай арыылары чинчийбит полярниктарга пааматынньыгы арыйыы былааннаналлар.
Ил Түмэн Арктика уонна аҕыйах ахсааннаах хотугу төрүт норуоттар проблемаларыгар сис кэмитиэтин бэрэссэдээтэлэ Виктор Губарев Усуйаана улууһугар хотугу үгэс буолбут салааларынан дьарыгырыы эйгэтигэр федеральнай уонна республикатааҕы сокуоннары олоххо киллэрии хаамыытын туһунан мунньаҕы ыытыаҕа. Хаһааччыйа төрүттэммитэ 375 сылыгар аналлаах общественность үөрүүлээх мунньаҕа буолуоҕа.
Субуотаҕа, муус устар 9 күнүгэр, үбүлүөйгэ аналлаах театрализованнай оонньуу кэнниттэн табаһыттар слеттара саҕаланыа. Бу күн көс ыаллар конкурстара, хотугу многоборьеҕа күрэх, атын да тэрээһиннэр ыытыллыахтара. Баскыһыанньаҕа бырааһынньык салҕаныа, киэһээ күрэхтэр түмүктэринэн кыайыылаахтары наҕараадалааһын буолуо.
Быйыл, үбүлүөйдээх сылга Хаһааччыйаҕа саҥа оскуола, үлэ геройдарын аллеята тутуллуохтаахтар, Арчы дьиэтэ уонна культурнай-спортивнай комплекс саҥардыллыахтаахтар. Олохтоох бюджет суотугар учаастактааҕы балыыһа өрөмүөннэниэхтээх.
Ил Түмэн пресс-сулууспата.
Комментарии
Сообщение:
Отправить Отмена