Күн бүгүн Саха сиригэр өрөспүүбүлүкэ тас өттүгэр көһүөхтээх уонна анараа дьиэлэнэр бырааптаах барыта 12425 ыал баар.
Ол туһунан соторутааҕыта үлэ уонна социальнай сайдыы миниистирэ Николай Дегтярев Ил Түмэн иннигэр билиһиннэрдэ. Бу дьон олорор дьиэ субсидиятын (сэртипикээтин) күүтэллэр эбит.
Уһук Хоту уонна онно тэҥнэнэр сирдэртэн букатын барар дьон анал сокуон быһыытынан, көһөр ороскуоттара федеральнай бүддьүөт эбээһинэһигэр киирэр. Ол эрээри дойду хааһыната бу сыалга аныыр үбэ биллэ кыччаан, оттон барыан баҕалааҕа эбиллэн иһэрэ көстөр. 2004-2010 сс. федеральнай хааһына суотугар 1197 сэртипикээт бэриллибит. Сэртипикээт сыаната үрдээн иһэр, ахсаана аҕыйыыр. Оттон барааччылар чугастыы олохтоох салалтаҕа тахсаллар. Онон дойду таһымыгар боппуруоһу туруорар наадата тирээбит.
Өрөспүүбүлүкэ тас өттүгэр көһөр баҕалаах, ордук элбэх киһи Нерюнгри оройуонугар тиксэр, Мииринэйтэн барааччы – 2373. Ону таһынан Кэбээйигэ, Ленскэйгэ, Өймөкөөҥҥө, Томпоҕо уонна Уус Майаҕа, Усуйаанаҕа эмиэ бааллар. Дьиэ сэртипикээтин кэтэһии болдьоҕо 7-12 сылга тэҥнэһэр.
Комментарии
Сообщение:
Отправить Отмена