Кулун тутар 20-22 кк. “Хатан” сурунаал Ньурба улууһугар ыалдьыттаата. Бу сырыы мээнэҕэ тэриллибэтэҕэ. Сүрүн соруга – оскуолаҕа оҕолор айан, суруйан таһаарар хаһыаттарын, сурунаалларын күрэһин тэрийии уонна маастар-кылаас ыытыы.

Ньурбаҕа үгүс оскуолаҕа хаһыат таһаараллар эбит. Сөхпүтүм диэн, оҕолор барытын сатыыллар – матырыйаал хомуйаллар, суруйаллар, көмпүүтэргэ аналлаах бырагыраамаҕа киллэрэн, таҥан хаһыат таһаараллар. Онтуларын оскуолаларыгар элбэтэн тарҕаталлар, атыылыыллар. Үс күннээх үлэ түмүгүнэн «School format» диэн 2 №-дээх оскуола хаһыата кыайан таҕыста уонна «Хатан» сурунаал сыл иккис аҥаарыгар сурутуунан наҕараадаланна. «Ситим» диэн Антоновка оскуолатын хаһыата «Бастыҥ бэчээтинэй таһаарыы» диэн ааты ылан «Ньурба» хаһыаттан анал бириис тутта.

Оттон атын хаһыат үлэһиттэрэ санааларын түһэрбэттэр, тоҕо диэтэххэ, оҕолор сыыйа-баайа ыстатыйаларын «Хатан» сурунаалга, «Кыым» хаһыакка бэчээттэтэр кыахтаннылар.

Ньурбаҕа суруйар баҕалаах, суруналыыс буолар санаалаах элбэх эбит. Маастар-кылааска отучча үөрэнээччи, учуутал сылдьыбытыгар эбии телестудия маастар кылаастарыгар икки бүк элбэх оҕо дьарыктанна. Дьарыгы «Саха» НКИК режиссера Сардаана Протодьяконова уонна Хампаанньа Ньурбатааҕы филиалын баай уопуттаах үлэһиттэрэ (сал. Т.Н. Молукова) ыыттылар. Кыттыбыт телестудиялар эмиэ араас бирииһи туттулар.

Тэрээһин бэркэ ааста. Улуус оҕолоро элбэҕи билэн-көрөн, аны сайын буолуохтаах Ыччат ыһыаҕын, «Кыым» хаһыат эдэр нэһилиэктэргэ анаан ыытар илиинэн от охсорго күүлэйи сырдатарга бэлэмнээх буоллулар. Биллэн турар, бэрт сыралаах үлэ кэтэһэр. Биир сүрүн сэрэтии быһыытынан эттэххэ, оҕолор хаһыаттара, сүнньүнэн, сахалыы тахсара буоллар. Ньурба улууһун хайдах да киһи тыла тахсан “нууччалар олорор улуустара” диэбэккин. Төһө да «Огни Нюрбы» диэн нууччалыы ааттаах хаһыат баарын иһин. Кэнэҕэһин сахалар уутуйан олохсуйбут улуустарыгар, үтүө үгэстэрдээх оскуолаларыгар сахалыы тыллаах хаһыаттар баар буолалларыгар баҕарабын. Түгэни туһанан улуустааҕы үөрэх салаатыгар, оҕону эбии үөрэхтээһин киинигэр, тэрийбит дьоҥҥо, чуолаан, Лариса Прокопьевна Андрееваҕа ис сүрэхтэн махтанабын.

kyym.sakha.ru
31.03.2011 19:32 | оригинал статьи | просмотров: 19968